Կամբոջան սխալմամբ գնդակոծել է Թաիլանդի տարածքը

Կամբոջայի զինված ուժերը սխալմամբ գնդակոծել են Թաիլանդի տարածքը և միջադեպից անմիջապես հետո կապ են հաստատել թայլանդական կողմի հետ։ Այդ մասին հայտնում է ՏԱՍՍ-ը՝ հղում անելով Թաիլանդի թագավորական ցամաքային զորքերի հայտարարությանը։

Նշվում է, որ հետաքննության արդյունքում պարզվել է՝ խոսքը Կամբոջայի տարածքից արձակված ականանետային արկի մասին է, որի պայթյունի հետևանքով մեկ թայլանդացի զինծառայող ստացել է թեթև բեկորային վնասվածքներ։ Կամբոջայի կողմը հայտարարել է, որ չի ունեցել Թաիլանդի տարածքը գնդակոծելու նպատակ, և միջադեպը տեղի է ունեցել սխալի հետևանքով։

Թաիլանդի իշխանությունները զգուշացրել են Կամբոջային առավելագույն զգուշավորություն ցուցաբերելու անհրաժեշտության մասին՝ ընդգծելով, որ նման դեպքերի կրկնության դեպքում Բանգկոկը կարող է դիմել պատասխան քայլերի՝ ինքնապաշտպանության նպատակով։ Հիշեցվում է, որ ավելի վաղ թայլանդական բանակը մեղադրել էր Կամբոջային հրադադարի ռեժիմի խախտման մեջ՝ Ուբոն Ռատչաթանի նահանգում տեղի ունեցած հրետակոծությունից հետո։