Դմիտրիևը հայտարարել է, որ Գրենլանդիան արդեն որոշում է կայացրել ԱՄՆ առաջարկների վերաբերյալ

Գրենլանդիան արդեն ընդունել է վերջնական որոշում ԱՄՆ-ի ներկայացրած առաջարկների հարցում։ Այդ մասին X սոցիալական հարթակում գրել է Ռուսաստանի նախագահի հատուկ ներկայացուցիչը ներդրումային և տնտեսական համագործակցության հարցերով, ՌԴ Ուղիղ ներդրումների հիմնադրամի ղեկավար Կիրիլ Դմիտրիևը։

Նա այս կերպ արձագանքել է ԱՄՆ նախագահ Դոնալդ Թրամփի հերթական հայտարարություններին, որոնցում վերջինս շեշտել էր, որ Վաշինգտոնը պետք է վերահսկի Գրենլանդիան՝ ազգային անվտանգության նկատառումներով։ Դմիտրիևը գրել է, որ «Գրենլանդիան, կարծես, արդեն որոշում է կայացրել», իսկ Եվրամիությունը, նրա բնորոշմամբ, շարունակելու է անել այն, ինչ «վասալներին ամենից լավ է ստացվում»՝ հետևել իրավիճակին և ցուցադրել կրկնակի չափանիշներ։

ՌԴ նախագահի հատուկ ներկայացուցիչը նաև հարցադրում է արել՝ արդյոք ԱՄՆ-ի հաջորդ թիրախը կարող է դառնալ Կանադան։ Նրա մեկնաբանությունը հետևել է Սպիտակ տան աշխատակազմի ղեկավարի տեղակալ Սթիվեն Միլլերի հայտարարությանը, ով կասկածի տակ էր դրել Դանիայի իրավասությունը Գրենլանդիայի նկատմամբ։