Ռուսաստանում արձագանքել են ԱՄՆ Պետդեպարտամենտի ռուսերեն հրապարակմանը

Ռուսաստանը որևէ մեկի հետ քաղաքական խաղեր չի վարում և գործում է իր հայտարարություններին համապատասխան։ Այդ մասին «Լենտա.ռու»-ին ասել է Պետդումայի միջազգային հարաբերությունների հանձնաժողովի նախագահի առաջին տեղակալ Ալեքսեյ Չեպան՝ մեկնաբանելով ԱՄՆ Պետդեպարտամենտի ռուսերեն գրառումը։

Նրա խոսքով՝ որոշ ամերիկյան կառույցներ խաղաղ համաձայնության թեմայով խոսելիս փորձում են ներկայացնել, թե Մոսկվան «քաղաքական խաղեր» է վարում, մինչդեռ Ռուսաստանը հետևողականորեն պահպանում է իր դիրքորոշումը՝ ձևակերպված Անկորիջում։ Չեպան ընդգծել է, որ այնտեղ հստակ ներկայացված դիրքորոշումից Ռուսաստանը չի շեղվել։

Պատգամավորը նաև նշել է, որ Ռուսաստանի հայտարարություններից ժամեր անց ԱՄՆ ԿՀՎ-ն հայտնել էր, թե տեղեկություն չունի Պուտինի նստավայրի դեմ հարձակման փորձի վերաբերյալ, սակայն ակնհայտ է, որ նման գործողությունը չէր կարող իրականացվել առանց հատուկ ծառայությունների մասնակցության։ Նրա խոսքով՝ Մոսկվայի կողմից բանակցային դիրքորոշման վերանայման մասին ազդակը տրամաբանական էր։ Ավելի վաղ ԱՄՆ նախագահ Դոնալդ Թրամփը չէր բացառել Ռուսաստանի դեմ պատժամիջոցների խստացման հնարավորությունը՝ նշելով, որ այդ հարցը քննարկվում է Կոնգրեսում։