Ճապոնիայում մի քանի րոպեում գրանցվել է չորս երկրաշարժ

Ճապոնիայի Սիմանե պրեֆեկտուրայում մի քանի րոպեի ընթացքում տեղի է ունեցել երկրաշարժերի շարք․ առաջին և ամենահզորը ունեցել է 6,4 մագնիտուդ ուժգնություն, որին հաջորդել են ևս երեք հետցնցումներ։ Այդ մասին հայտնում են տեղական լրատվամիջոցները՝ հղում անելով սեյսմոլոգիական տվյալներին։

Առաջին երկրաշարժը գրանցվել է առավոտյան ժամը 10-ին, իսկ դրա օջախը գտնվել է մոտ 11 կիլոմետր խորության վրա։ Հետցնցումները զգացվել են Սիմանեի արևելյան հատվածում, ինչպես նաև Տոտտորի պրեֆեկտուրայի արևմուտքում՝ մոտ 5 բալ ինտենսիվությամբ։ Ցնցումները զգացվել են նաև Օկայամա, Հիրոսիմա, Կագավա և Էհիմե պրեֆեկտուրաներում։ Տոտտորիում նման ուժգնությամբ երկրաշարժ վերջին անգամ գրանցվել էր 2016-ին, իսկ Սիմանեում՝ 2018-ին։

Ցունամիի վտանգ չի հայտարարվել։ Տեսագրությունները ցույց են տալիս, որ լայնածավալ ավերածություններ չեն եղել, սակայն որոշ շրջաններում արձանագրվել են ջրամատակարարման խափանումներ, ճանապարհների վնասումներ և շինությունների տանիքների մասնակի վնասում։ Մացուե քաղաքի հրշեջ ծառայությունը ստացել է մի քանի ահազանգ՝ մարդկանց ընկնելու հետևանքով ստացած վնասվածքների մասին․ հոսպիտալացվել է հինգ մարդ։ «Սիմանե» ատոմակայանում արտակարգ իրավիճակներ չեն արձանագրվել։