Ռուսաստանում երկու տարին մեկ կվերլուծեն թոշակառուների սոցիալ-տնտեսական վիճակը

Ռուսաստանում առաջիկա տարիներին պարբերաբար կվերլուծվի թոշակառուների սոցիալ-տնտեսական վիճակը։ Այդ մասին նշվում է տարեց քաղաքացիների շահերի պաշտպանության ռազմավարության իրականացման հաստատված ծրագրում, որը գործում է մինչև 2036 թվականը։ Վերլուծությունները նախատեսվում է իրականացնել երկու տարին մեկ՝ 2026, 2028 և 2030 թվականներին։

Փաստաթղթի համաձայն՝ համապատասխան զեկույցները պետք է պատրաստի Բարձրագույն տնտեսագիտական դպրոցը՝ դրանք ներկայացնելով ՌԴ աշխատանքի նախարարությանը և հրապարակելով համալսարանի պաշտոնական կայքում։ Սպասվում է, որ այս ուսումնասիրությունները հիմք կդառնան թոշակառուների սոցիալ-տնտեսական վիճակի բարելավմանն ուղղված նոր առաջարկների մշակման համար։

Ռազմավարությունը, որը կառավարությունը հաստատել է անցյալ տարվա ապրիլին, նախատեսում է տարեցների նկատմամբ հասարակական հարգանքի ամրապնդում, նրանց առողջության պահպանման ու բժշկական օգնության հասանելիության բարձրացում, սոցիալական ծառայությունների զարգացում, կյանքի որակի և ֆինանսական ապահովվածության բարելավում, ինչպես նաև անվտանգ ու հարմարավետ միջավայրի ստեղծում։ Ավելի վաղ փոխվարչապետ Տատյանա Գոլիկովան հայտնել էր, որ առաջիկա 15 տարիներին Ռուսաստանի տարեց բնակչության թիվը կավելանա գրեթե 10 միլիոնով։