«Ոչ մի նոր բան». Մեդվեդև

Ռուսաստանի Անվտանգության խորհրդի նախագահի տեղակալ Դմիտրի Մեդվեդևը հայտարարել է, որ ԱՄՆ-ի կողմից Ռուսաստանի նկատմամբ տնտեսական ճնշումը կշարունակվի ցանկացած պայմաններում։ Իր Telegram-ալիքում նա ապագա հակառուսական պատժամիջոցները գնահատել է «ոչ մի նոր բան» արտահայտությամբ՝ ընդգծելով, որ այս հարցում որևէ պատրանք չունի։

Մեդվեդևի խոսքով՝ Վաշինգտոնը կփորձի Ռուսաստանին հարկադրել անվտանգության երաշխիքների և տարածքային հարցերի շուրջ այնպիսի փոխզիջումների, որոնք Մոսկվայի համար բացարձակապես անընդունելի են։ Նրա գնահատմամբ՝ այդ սցենարի դեպքում Սպիտակ տան ղեկավարը «ստիպված» կլինի խստացնել պատժամիջոցները՝ հենվելով ամերիկացի սենատոր Լինդսի Գրեմի նախաձեռնած օրենքի վրա։ «Տհաճ է, բայց ոչ մի նոր բան։ Այս անգամ էլ կդիմանանք»,– գրել է Մեդվեդևը։

Ավելի վաղ լրատվամիջոցները հայտնել էին, որ ԱՄՆ նախագահ Դոնալդ Թրամփը, ենթադրաբար, «կանաչ լույս» է տվել Ռուսաստանի դեմ պատժամիջոցների խստացման մասին օրինագծին։ Սենատոր Գրեմի խոսքով՝ այդ փաստաթղթի քվեարկությունը կարող է տեղի ունենալ արդեն հաջորդ շաբաթ։