Ռուսաստանի ՊՆ-ն հայտնել է՝ գիշերը խոցվել է Ուկրաինայի 59 անօդաչու թռչող սարք

Ռուսաստանի հակաօդային պաշտպանության ուժերը գիշերվա ընթացքում Ռուսաստանի տարածքի վրա խոցել և ոչնչացրել են Ուկրաինայի զինված ուժերին պատկանող 59 անօդաչու թռչող սարք։ Այդ մասին հաղորդել է Ռուսաստանի պաշտպանության նախարարությունը՝ հրապարակելով օպերատիվ տեղեկանք։

Պաշտոնական տվյալների համաձայն՝ հերթապահ ՀՕՊ միջոցներով խոցվել են ինքնաթիռային տիպի ուկրաինական անօդաչուներ մի շարք տարածաշրջաններում։ Մասնավորապես՝ 11 դրոն ոչնչացվել է Սև ծովի ջրային տարածքում, 10-ը՝ Կրասնոդարի երկրամասում, ութը՝ Բրյանսկի մարզում, վեցը՝ Լիպեցկի մարզում։ Եվս չորսական անօդաչու խոցվել է Կալուգայի մարզում, Ադիգեայում, Ղրիմում և Ազովի ծովի վրա։

Բացի այդ, երեք դրոն վնասազերծվել է Մոսկվայի տարածաշրջանի վրա, այդ թվում՝ մեկը շարժվում էր մայրաքաղաքի ուղղությամբ։ Երկու անօդաչու խոցվել է Բելգորոդի մարզում, իսկ մեկական՝ Վորոնեժի, Սմոլենսկի և Տուլայի մարզերում։ Ռուսաստանի պաշտպանության նախարարությունը կրկնել է, որ ի պատասխան Ուկրաինայի զինված ուժերի հարձակումների քաղաքացիական ենթակառուցվածքների վրա՝ ռուսական զորքերը հարվածներ են հասցնում միայն ռազմական օբյեկտներին և Ուկրաինայի ռազմաարդյունաբերական համալիրի ձեռնարկություններին՝ բարձր ճշգրտության զենքով։