ԱՄՆ-ն այլ երկրների հետ համատեղ Սիրիայում հարվածել են ԻՊ-ի ավելի քան 35 թիրախի

ԱՄՆ զինված ուժերը այլ երկրների հետ համատեղ շաբաթ օրը ավիահարվածներ են հասցրել Սիրիայում ԻՊ-ի (Իսլամական պետություն) օբյեկտներին, հայտնել է ԱՄՆ Կենտրոնական հրամանատարությունը (CENTCOM) X սոցիալական ցանցում։

Այս հարվածները նշանավորեցին «Բազեի աչքի հարված» կոչվող գործողության երկրորդ ալիքը՝ ի պատասխան դեկտեմբերին ԻՊ-ի կազմակերպած դարանակալման, որի հետևանքով զոհվել էին Այովայի բանակի Ազգային գվարդիայի երկու զինվոր և որպես թարգմանիչ աշխատող ԱՄՆ քաղաքացիական անձը։

«Այսօրվա հարվածները հասցվել են Սիրիայի ողջ տարածքում ԻՊ-ի դիրքերին՝ մեր մարտիկների դեմ ուղղված իսլամական ահաբեկչությունը վերացնելու, հետագա հարձակումները կանխելու և տարածաշրջանում ամերիկյան ու գործընկեր ուժերը պաշտպանելու մեր մշտական հանձնառության շրջանակում,- ասված է CENTCOM-ի հայտարարության մեջ։- ԱՄՆ-ի և կոալիցիայի ուժերը նախկինի պես վճռական են տրամադրված հետապնդելու այն ահաբեկիչներին, որոնք ձգտում են վնաս հասցնել Միացյալ Նահանգներին»։

Հարվածներին մասնակցել է ավելի քան 20 ինքնաթիռ, այդ թվում՝ F-15E, A-10, AC-130J, MQ-9 և հորդանանյան F-16-ներ, որոնք ավելի քան 90 բարձր ճշգրտության զինամթերք են արձակել 35-ից ավելի թիրախների ուղղությամբ, Politico պարբերականին հայտնել է ԱՄՆ ռազմական պաշտոնյան։

Անցյալ տարվա հունվարին Սպիտակ տուն վերադառնալուց ի վեր նախագահը հավանություն է տվել հարվածներ հասցնելուն, մասնավորապես, Նիգերիային, Վենեսուելային, Սիրիային և Իրանին։