Ուրբաթ օրվանից տեղեկություն չունենք, այս պահին էլ չենք կարողանում կապ հաստատել Իրանի մեր հայրենակիցների հետ. Սինանյան

Ուրբաթ օրվանից տեղեկություն չունենք, այս պահին էլ չենք կարողանում կապ հաստատել Իրանի մեր հայրենակիցների հետ, ինչը մեզ շատ է անհանգստացնում: Մենք շարունակելու ենք ջանքերը՝ կապ հաստատելու: Այդ մասին ասուլիսի ժամանակ ասաց ՀՀ սփյուռքի գործերի գլխավոր հանձնակատար Զարեհ Սինանյանը՝ անդրադառնալով հարցին, թե Իրանում տեղի ունեցող բողոքի ցույցերի ֆոնին ի՞նչ աջակցություն է ցուցաբերվում մեր հայրենակիցներին, և արդյոք կա՞ն աշխատանքներ տարհանման մասով:

«Երբ նման դեպք եղավ Իսրայելի և Իրանի միջև 12-օրյա պատերազմի ընթացքում, մենք ռեսուրս ձեռք բերեցինք սահմանին՝ Մեղրիում, և սահմանն անցնող մեր հայրենակցների միջոցով էինք սկսում ինֆորմացիա ստանալ: Երևի նույն բանը այսօրվանից պիտի սկսենք անել այնտեղ [Մեղրիում], այլապես, բնական է, տեղեկատվական դադարը մեզ շատ է անհանգստացնում: Չունենք բավականին տեղեկություն, որոպեսզի կարողանանք խոսել տարհանման մասին:

Ուզում եմ հիշեցնել, որ երբ 2023-ին սկսվեց ՀԱՄԱՍ-Իսրայել առճակատման վերջին փուլը, մենք ռազմական գործողությունների առաջին 10 օրվա ընթացքում մեր հայրենակիցների մի մեծ խմբի տարհանեցինք Իսրայելից և մենք էինք պնդում, որ դա տեղի ունենա:

Հենց որ տեսնենք՝ համապատասխան տեղեկություն ունենք՝ կապված Իրանի մեր հայրենակիցների հետ, որը մեզ հնարավորություն է տալիս այս պնդումն անելու Կառավարությունում, իհարկե դա կանենք:

Բայց այս պահին մենք շատ անհանգստացած ենք, որովհետև ուրբաթ օրվանից սրվել է ամեն ինչ»,- ասաց նա՝ հիշեցնելով, որ ուրբաթ օրն ամենասուր բախումների առաջին փուլն է եղել, չնայած ցույցերն արդեն 12-13 օր է, ինչ ընթանում են:

Ինչ վերաբերում է Իրան մասնագիտական խումբ ուղարկելուն, Զարեհ Սինանյանն իրատեսական չի համարում: Կարծում է՝ նախ պետք է պարզել՝ ինչ է տեղի ունենում հայաշատ երկու քաղաքներում, տեղեկություն ստանալ, ապա քայլեր ձեռնարկել:

Իրանում իրավիճակը մնում է ծայրաստիճան լարված: Հակակառավարական ցույցերը չեն դադարում: Միացյալ Նահանգների նախագահը հայտարարել է, որ Թեհրանն իր հետ բանակցելու առաջարկ է արել: Միևնույն ժամանակ՝ Իրանի կառավարությունը երկրում եռօրյա ազգային սուգ է հայտարարել: