Իսրայելը ռմբակոծել է Լիբանանի գյուղերից մեկը

Իսրայելի ռազմաօդային ուժերի կործանիչները հարվածել են շիաների «Հեզբոլլահ» շարժմանը պատկանող ռազմական թիրախներին Լիբանանի հարավում գտնվող Սաիդա քաղաքից 8 կիլոմետր հեռավորության վրա գտնվող Քֆար Հաթթա գյուղում, հաղորդում է տեղական Al Jadeed հեռուստաալիքը։

Հեռուստաալիքի տվյալներով՝ ինքնաթիռը հարվածել է առնվազն հինգ բնակելի համալիրի։ Բնակիչները տարհանվել էին նախապես՝ Իսրայելի պաշտպանության ուժերի (IDF) նախազգուշացումից հետո։ IDF-ի խոսնակ Ավիխայ Էդրին արաբերենով X սոցիալական ցանցում տեղադրված տեսանյութում պահանջել է, որ բնակիչները տարհանվեն քարտեզի վրա կարմիրով նշված վտանգավոր գոտու մոտ գտնվող իրենց տներից։

Ավելի ուշ նա հայտարարել է, որ հարվածները ուղղված են բնակելի համալիրի տարածքում հայտնաբերված զենքի պահեստավորման թունելներին։ Էդրին հայտարարել է, որ Լիբանանի հարավում «Հեզբոլլահի» կողմից նման գործողությունները խախտում են 2024 թվականի նոյեմբերի 27-ի երկկողմանի հրադադարի համաձայնագիրը։