Զելենսկի․ Ռուսաստանի գիշերային հարվածների գլխավոր թիրախը եղել է Ուկրաինայի էներգետիկան

Ուկրաինայի նախագահ Վլադիմիր Զելենսկի-ն Telegram-ում մեկնաբանել է հունվարի 13-ի գիշերը երկրի դեմ իրականացված ռուսական հարձակումը՝ նշելով, որ հիմնական թիրախը եղել են էներգետիկ ենթակառուցվածքները։ Նրա խոսքով՝ հարվածները ուղղված են եղել էլեկտրաէներգիայի արտադրությանը և ենթակայաններին։

Զելենսկին հայտնել է, որ Ռուսաստանը գիշերվա ընթացքում Ուկրաինայի ուղղությամբ արձակել է մոտ 300 հարվածային դրոն, որոնց մեծ մասը «Շահեդ» տեսակի է եղել, ինչպես նաև 18 բալիստիկ և 7 թևավոր հրթիռ։ Նրա խոսքով՝ հարվածները կրկին նպատակաուղղված են եղել երկրի էներգետիկ համակարգի վնասմանը։

Հարձակման հետևանքով հարվածներ են հասցվել Դնեպրոպետրովսկի, Ժիտոմիրի, Զապորոժիեի, Կիևի, Օդեսայի, Սումիի և Խարկովի մարզերին։ Ավելի վաղ հաղորդվել էր, որ նույն գիշեր Ուկրաինայի դեմ կիրառվել է «Իսկանդեր-Մ» օպերատիվ-մարտավարական համալիրի բալիստիկ հրթիռների ռեկորդային քանակ, որոնց շուրջ 20 հարված գրանցվել է Զապորոժիեի և Դնեպրոպետրովսկի մարզերում, ինչպես նաև Կիևում և Խարկովում։