Boeing-ի գլխավոր մրցակիցը ավելացրել է ինքնաթիռների մատակարարումները

Եվրոպական ավիաշինարարական հսկա Airbus-ը 2025 թվականին ավելացրել է կոմերցիոն ինքնաթիռների մատակարարումները՝ նախորդ տարվա համեմատ գրանցելով շուրջ 4 տոկոս աճ։ Ընկերության պաշտոնական տվյալների համաձայն՝ տարվա ընթացքում տարբեր երկրներում գործող 91 պատվիրատուի փոխանցվել է ընդհանուր առմամբ 793 ուղևորատար ինքնաթիռ։

2025 թվականի դեկտեմբերի վերջի դրությամբ Airbus-ի պատվերների պորտֆելը հասել է ռեկորդային մակարդակի՝ 8 754 ինքնաթիռ, ինչը, ընկերության գնահատմամբ, վկայում է շուկայում բարձր և կայուն պահանջարկի մասին։ Մատակարարված օդանավերից 93-ը եղել են A220 ընտանիքի նեղֆյուզելաժային ինքնաթիռներ, ևս 607-ը՝ A320 շարքի տարբեր մոդելներ։

Բացի այդ, հաճախորդներին է փոխանցվել 36 լայնֆյուզելաժային A330 և 57 A350 ինքնաթիռ։ Միաժամանակ հիշեցվում է, որ 2025 թվականի դեկտեմբերի սկզբին Airbus-ի բաժնետոմսերը նվազել էին մոտ 10 տոկոսով՝ A320 ընտանիքի որոշ ինքնաթիռներում ֆյուզելյաժի պանելների որակի հետ կապված խնդիրների մասին տեղեկությունների հրապարակումից հետո։