Պատգամավորը Ռուսաստանում չի տեսնում տնտեսական իրավիճակի բարելավման հեռանկար

2025 թվականին Ռուսաստանը չի ձևավորել որևէ հիմք, որը կարող էր ապահովել տնտեսական աճ 2026-ին․ նման կարծիք է հայտնել Պետդումայի տնտեսական քաղաքականության հանձնաժողովի նախագահի առաջին տեղակալ Նիկոլայ Արեֆևը՝ RTVI-ին տված հարցազրույցում։ Նրա խոսքով՝ նախորդ տարին տնտեսությանը թողել է «վատ ժառանգություն», և չի բացառվում, որ երկիրը կարող է բախվել ռեցեսիայի։

Արեֆևը նշել է, որ ներկայիս տնտեսական վիճակը իրեն «բացարձակապես դուր չի գալիս»․ վեցտոկոսանոց ինֆլյացիայի պայմաններում գրեթե որևէ իրական աճ չի արձանագրվել։ Նրա գնահատմամբ՝ սեփական արտադրությունը գրեթե բացակայում է, իսկ բարձր հիմնական տոկոսադրույքի պատճառով վարկերից զրկված ձեռնարկությունները հարկադրված են դադարեցնել գործունեությունը։ Պատգամավորի խոսքով՝ փակվող ձեռնարկությունների թիվը մոտ երկու անգամ գերազանցում է նոր բացվողներին։

Բացասական գործոնների թվում Արեֆևը նշել է նաև խստացող պատժամիջոցները և երկրի ուժեղ կախվածությունը ներմուծումներից։ Նրա խոսքով՝ Ռուսաստանը նավթային մոդելից անցել է նոր՝ հումքային կախվածության՝ կենտրոնանալով մետաղների, հանքաքարերի և ածխի արտահանման վրա, իսկ առանձին «ասեղ» է դարձել նաև ոսկին՝ երկրում զարգացած ոսկու ձուլակտակների լայնածավալ սպեկուլյացիայի պատճառով։ «Այս փուլում ես որևէ հեռանկար չեմ տեսնում իրավիճակի բարելավման համար, և կառավարությունը դեռևս հստակ քայլեր չի ձեռնարկում», — եզրափակել է պատգամավորը։