Վենեսուելայի կառավարությունը հայտարարել է ևս 116 քաղբանտարկյալի ազատ արձակման մասին

Վենեսուելայի կառավարությունը հայտարարել է ևս 116 քաղբանտարկյալի ազատ արձակման մասին. նրանց թվում են ինչպես վենեսուելացիներ, այնպես էլ օտարազգիներ: Այսպիսով՝ հունվարի սկզբին Կարակասում ամերիկյան գործողությունից հետո ընդհանուր առմամբ ազատ է արձակվել 133 մարդ: Սակայն իրավապաշտպան ՀԿ-ները հաստատել են միայն 24 քաղբանտարկյալի ազատ արձակման փաստը: Գործընթացը մեկնարկել է Նիկոլաս Մադուրոյի ձերբակալությունից հետո՝ Վենեսուելայի նախագահի պաշտոնը ստանձնած Դելսի Ռոդրիգեսի հրամանով:

 

Ավելի վաղ Վաշինգտոնը պահանջել էր բանտերից ազատել Մադուրոյի իշխանության օրոք ձերբակալված քաղբանտարկյալներին՝ ներգրավելու նրանց Վենեսուելայի վերականգնմանը: Ռոդրիգեսն էլ հայտարարել է, որ ազատում են մի շարք ձերբակալվածների՝ հանուն խաղաղ համակեցության:

 

Տարբեր տվյալներով՝ 2026 թվականի հունվարի դրությամբ Վենեսուելայում քաղբանտարկյալների թիվը հատում է 800-ը: 

 

ՄԱԿ-ը ողջունել է վերջին օրերին Վենեսուելայում որոշ քաղբանտարկյալների ազատ արձակումը, միևնույն ժամանակ մտահոգություն հայտնել, որ երկրում դեռ շարունակվում են բռնաճնշումները և մարդու իրավունքների խախտումները։