Կոստա Ռիկայում կանխվել է նախագահի դեմ ծրագրված մահափորձը

Կոստա Ռիկայի նախագահ Ռոդրիգո Չավեսի դեմ մահափորձ է նախապատրաստվել փետրվարին նախատեսված ընտրություններից մի քանի օր առաջ․ այդ մասին հայտարարել է երկրի հետախուզության և ազգային անվտանգության վարչության ղեկավար Խորխե Տորեսը Repretel հեռուստաալիքի եթերում։ Նրա խոսքով՝ իրավապահները ստացել են գաղտնի աղբյուրից տեղեկատվություն, որը վերաբերում է պետության ղեկավարի կյանքի սպառնալիքին։

Տորեսը հայտնել է, որ արդեն ներկայացվել է քրեական դիմում՝ ստացված տվյալների հիման վրա։ Կոստա Ռիկայի հետախուզական ծառայությունների փոխանցմամբ՝ մահափորձի կազմակերպման մեջ կասկածվող անձի ինքնությունը պարզվել է, իսկ գործով իրականացվում է ակտիվ քննություն։ Կասկածյալը, սակայն, պնդում է, որ մեղավոր չէ։

Ավելի վաղ նմանատիպ դեպք էր արձանագրվել նաև Բուրկինա Ֆասոյում, որտեղ անվտանգության ծառայությունները հայտնել էին բարձրաստիճան պաշտոնյաների և երկրի նախագահ Իբրահիմ Տրաորեի դեմ նախապատրաստվող հարձակման կանխման մասին։ Տեղեկությունների համաձայն՝ հունվարի 3-ին ծրագրավորվել էր հարձակում խաղաղ բնակչության, զինվորականների և պետության ղեկավարի դեմ։