MWM․ Չինաստանը միջուկային սուզանավերի թվով առաջ է անցել Ռուսաստանից

Չինաստանի ռազմածովային ուժերը միջուկային սուզանավերի քանակով գերազանցել են Ռուսաստանին․ գրում է Military Watch Magazine հանդեսը։ Պարբերականի տվյալներով՝ Չինաստանն այժմ ունի 32 գործող միջուկային սուզանավ, մինչդեռ Ռուսաստանի զինանոցում նման նավերի թիվը գնահատվում է 25–28-ի սահմաններում։

Հանդեսը նշում է, որ միջուկային սուզանավերի թվով Չինաստանն այս պահին զիջում է միայն Միացյալ Նահանգներին՝ ամրապնդելով իր դիրքերը որպես աշխարհի խոշորագույն ռազմածովային ուժերից մեկը։ Վերլուծաբանների կարծիքով՝ այս ցուցանիշը վկայում է Պեկինի հետևողական ներդրումների և արագ զարգացման մասին ռազմածովային ոլորտում։

Միևնույն ժամանակ Ռուսաստանում շարունակում են ընդգծել ռազմածովային ներուժի արդիականացման գործընթացը։ Դեկտեմբերին ՌԴ նախագահի վարչակազմի պաշտպանական արդյունաբերության ոլորտի պետական քաղաքականության վարչության ղեկավար Վիկտոր Եվտուխովը հայտնել էր, որ 2025 թվականին նավաշինարարական ձեռնարկությունները ՌԴ ռազմածովային նավատորմին հանձնել են 19 նավ և երեք սուզանավ։ Իսկ ավելի վաղ նախագահ Վլադիմիր Պուտինը հայտարարել էր «Պոսեյդոն» միջուկային էներգետիկ համակարգով անօդաչու ստորջրյա ապարատի փորձարկումների անցկացման մասին։