Բլոգերի մահից հետո ռուս կանայք հրաժարվում են հետույքի մեծացումից

Ռուսաստանում կանայք զանգվածաբար սկսել են հրաժարվել հետույքի մեծացման պրոցեդուրաներից՝ հայտնի բլոգեր Յուլիա Բուրցևայի մահից հետո, հայտնում է Baza-ն։ Տարվա սկզբից ֆիլլերներով հետույքի մեծացում իրականացնող մասնավոր կլինիկաները գրանցել են պահանջարկի կտրուկ անկում՝ մինչև 40 տոկոս։ Մոսկվայի, Կազանի, Իրկուտսկի և Վլադիվոստոկի բժշկական կենտրոնների ներկայացուցիչների խոսքով՝ նախկինում օրական անցկացվում էին 4–6 խորհրդատվություն, իսկ այժմ՝ շաբաթական ընդամենը 1–2։

Փորձագետները պահանջարկի նվազումը կապում են հունվարի 4-ին Մոսկվայի Elmas Clinic-ում տեղի ունեցած միջադեպի հետ, երբ 38-ամյա բլոգերը միջամտության ընթացքում ծանր ալերգիկ արձագանք է ունեցել և հայտնվել կոմայի մեջ։ Ըստ աղբյուրների՝ պրոցեդուրան իրականացրել է 26-ամյա անձ, որը չի ունեցել համապատասխան մասնագիտական կրթություն և լիցենզիա, ինչի կապակցությամբ հարուցվել է քրեական գործ։

Միջադեպից հետո կոսմետոլոգները սկսել են առաջարկել այլընտրանքային տարբերակներ՝ կաթնաթթվի հիմքով պատրաստուկներ, իսկ որոշ կլինիկաներ՝ լիպոֆիլինգ և իմպլանտներ։ Այնուամենայնիվ, նշվում է, որ կանայք այժմ զգալիորեն ավելի մանրամասն են հետաքրքրվում հնարավոր ռիսկերով և բարդություններով, ինչը նախկինում հազվադեպ էր հանդիպում։