Ռեփեր Գուֆը դատարանում չի ընդունել մեղադրանքը

Նարո-Ֆոմինսկի դատարանում սկսվել է ռեփեր Ալեքսեյ Դոլմատովի (Գուֆ) դեմ հարուցված քրեական գործի քննությունը՝ գողության մեղադրանքով։ Դատարանի մամուլի ծառայության փոխանցմամբ՝ երաժիշտը իրեն առաջադրված մեղադրանքը չի ընդունել, նույն դիրքորոշումն ունի նաև գործով երկրորդ մեղադրյալ Գևորգ Սարուխանյանը։

Դատական նիստը հետաձգվել է մինչև հունվարի 30-ը՝ տուժողի չներկայանալու պատճառով։ Նշվում է, որ Գուֆը գտնվում է չհեռանալու մասին ստորագրության տակ։

Ըստ մեղադրանքի վարկածի՝ 2024 թվականի հոկտեմբերի 23-ին Նարո-Ֆոմինսկում գտնվող բաղնիք-առողջարանային համալիրում ծագած կոնֆլիկտի ընթացքում ռեփերն ու նրա ընկերը տուժողից վերցրել են բջջային հեռախոսը։ Տուժողը հանդիսանում է բաղնիքի ադմինիստրատորի եղբայրը՝ նախկին իրավապահ։ Կոնֆլիկտը սկսվել է ծխելու համար տուգանքը հաշվում ներառելու փորձից հետո։ Ավելի վաղ հաղորդվել էր, որ ոստիկանությունը ժամանակավորապես դադարեցրել էր գործի վարույթը, սակայն այն վերականգնվել է։