Վենեսուելան սկսում է վերականգնել նավթի արդյունահանումը՝ ԱՄՆ սահմանափակումների թուլացման ֆոնին

Վենեսուելայի պետական նավթային ընկերությունը՝ PDVSA-ն, աստիճանաբար չեղարկում է նավթի արդյունահանման կրճատման միջոցները՝ ԱՄՆ-ի կողմից կիրառված էմբարգոյի թուլացման պայմաններում․ հայտնում է Reuters-ը՝ հղում անելով աղբյուրներին։ Դեկտեմբերին երկրի նավթի արտահանումը գրեթե զրոյացել էր, և մատակարարումները շարունակել էր միայն ամերիկյան Chevron ընկերությունը՝ PDVSA-ի հետ համատեղ նախագծերից՝ Վաշինգտոնի տրամադրած լիցենզիայի շնորհիվ։

Մատակարարումների խափանման հետևանքով Վենեսուելայի ցամաքային պահեստներում և տանկերներում կուտակվել էին միլիոնավոր բարել նավթ, ինչի պատճառով ընկերությունը ստիպված էր փակել հորատանցքեր։ Նոյեմբերի վերջին օրական արդյունահանումը կազմում էր մոտ 1,16 մլն բարել, իսկ անցած շաբաթ՝ արդեն շուրջ 880 հազար բարել։

Սակայն հունվարի սկզբին Վենեսուելայի նախագահ Նիկոլաս Մադուրոյի ձերբակալությունից հետո ԱՄՆ-ի ճնշումը նավթային ոլորտի նկատմամբ սկսել է թուլանալ։ Հունվարի 13-ի երեկոյան Վենեսուելայի տարածքային ջրերից ազատ դուրս են եկել երկու սուպերտանկեր՝ յուրաքանչյուրում 1,8 մլն բարել նավթով․ ենթադրվում է, որ դրանք առաջին մատակարարումներն են Կարակաս–Վաշինգտոն համաձայնագրի շրջանակում՝ ընդհանուր 50 մլն բարելի համար։ Միևնույն ժամանակ ԱՄՆ-ը վերջին շաբաթներին միջազգային ջրերում առգրավել է վենեսուելական նավթ տեղափոխելու կասկածանքով հինգ նավ և հայտարարել է նման գործողությունները շարունակելու մասին։