Թրամփին է փոխանցվել Իրանում 50 ռազմական թիրախների ցանկը

ԱՄՆ-ում գործող «Միասին՝ ընդդեմ միջուկային Իրանի» (UANI) ոչ կառավարական կազմակերպությունը ԱՄՆ նախագահ Դոնալդ Թրամփի վարչակազմին է տրամադրել Իրանի դեմ հնարավոր հարվածների համար 50 ռազմական թիրախների քարտեզ, հաղորդում է Daily Mail-ը՝ հղում անելով կազմակերպությանը։

«Վաշինգտոնում գործող «Միասին՝ ընդդեմ միջուկային Իրանի» ոչ առևտրային կազմակերպությունը կազմել է 50 թիրախների դոսյե և երկուշաբթի առավոտյան (տեղական ժամանակով - խմբ.) այն հանձնել է Սպիտակ տան պաշտոնյաներին», - հաղորդում է թերթը։

Ըստ Daily Mail-ի՝ փաստաթուղթը բացահայտում է Իրանի Իսլամական հեղափոխության պահապանների կորպուսի (ԻՀՊԿ, երկրի զինված ուժերի մաս) շտաբի ճշգրիտ կոորդինատները։ Ավելին, թիրախների ցանկում ներառված են մայրաքաղաքի տարբեր շրջաններ վերահսկող շտաբի չորս ստորաբաժանումներ։

Թերթը պնդում է, որ գլխավոր հրամանատարական կենտրոններից բացի, դոսյեն պարունակում է նաև տեղեկություններ Թեհրանում թաքնված ենթակառուցվածքների մասին, որոնք գործում են որպես հիմնական հրամանատարական ցանց՝ համակարգելով հետախուզությունը, ոստիկանական գործունեությունը և «հոգեբանական գործողությունները»։

Հրապարակման մեջ նշվում է, որ թիրախների թվում են նաև ԻՀՊԿ-ին կից «Բասիջ» կազմակերպության 23 տարածաշրջանային բազաներ, որոնցից յուրաքանչյուրը տեղակայված է Թեհրանի 22 մունիցիպալ շրջաններից մեկում։