Զոի Սալդանան դարձել է բոլոր ժամանակների ամենաբարձր վարձատրվող դերասանուհին

«Ավատար. Կրակ և մոխիր» ֆիլմի համաշխարհային կինովարձույթում տարած հաղթանակից հետո, 47-ամյա «Օսկար» մրցանակակիր Զոի Սալդանան գերազանցել է Սքարլեթ Յոհանսոնին։ Numbers-ի տվյալներով՝ նոր «Ավատար»-ի կինովարձույթում ստացված եկամուտները նրա ընդհանուր գումարին ավելացրել են ավելի քան 1.2 միլիարդ դոլար՝ ամբողջ աշխարհում նրա ֆիլմերը հասցնելով ավելի քան 15.46 միլիարդ դոլարի։

Այս արդյունքին հասել են «Ավատար» ֆրանշիզայի նախորդ ֆիլմերի, ինչպես նաև «Գալակտիկայի պահապանները» եռագրության և Marvel-ի «Վրիժառուները» ֆիլմերի շնորհիվ։ Սալդանան նաև հաջողությունների է հասել «Աստղային ճանապարհ» ֆիլմերով և «Կարիբյան ծովի ծովահենները» առաջին ֆիլմով։

Անցյալ տարի Յոհանսոնը զբաղեցրել է առաջին տեղը «Ջուրասիկ աշխարհ. վերածնունդ» ֆիլմից հետո, որը ամբողջ աշխարհում վաստակել է 869 միլիոն դոլար։ Դերասանուհին նաև նկարահանվել է Marvel-ի մի քանի ֆիլմերում։

Նոր ֆիլմը՝ «Ավատար. Կրակ և մոխիրը», կինովարձույթի առումով զիջում է ֆրանշիզայի նախորդ ֆիլմերին, բայց դեկտեմբերյան թողարկումից ի վեր մնում է ԱՄՆ կինովարձույթի առաջին հորիզոնականում։ Սալդանան նաև հնչյունավորել է Pixar-ի ամառային արկածային «Էլիո» ֆիլմի կերպարներից մեկին, սակայն ֆիլմն այդքան էլ հաջողված չէր։

Անցյալ տարի Սալդանան արժանացավ «Օսկար» մրցանակի՝ որպես երկրորդ պլանի լավագույն դերասանուհի՝ Netflix-ի «Էմիլիա Պերես» քրեական մյուզիքլում իր դերի համար։ Ներկայումս նա աշխատում է «Առյուծուհի» մարտաֆիլմի նոր եթերաշրջանի վրա։