Պետդումայում խոստացել են «կոշտ հաշվեհարդար տեսնել» «Բուրատինաների» ու «Բրեմենյան երաժիշտների» հետ

Ռուսաստանի Պետդումայում կոշտ հայտարարություններ են հնչել մշակութային ոլորտում պետական ֆինանսավորման թեմայով։ «Կոմերսանտ»-ի փոխանցմամբ՝ հունվարի 14-ին մշակույթի հարցերով կոմիտեի նիստում քննարկվել է օրինագիծ, ըստ որի՝ Մշակույթի նախարարությունը կկարողանա ինքնուրույն որոշել այն առաջնահերթ թեմաները, որոնց շուրջ նկարահանվող ֆիլմերը կարող են ստանալ պետական աջակցություն։

Պատգամավոր Իվան Մուսատովը հայտարարել է, որ Ռուսաստանում դեռ կան ռեժիսորներ, որոնք աշխատում են Ալեքսանդր Ռոդնյանսկու նման ոճով (վերջինս Ռուսաստանում ճանաչված է օտարերկրյա գործակալ), և կոչ է արել նման գործիչներին «բացահայտել ու ֆիլտրել»։ Նրա խոսքով՝ նախկինում նրանք նկարահանում էին Անդրեյ Զվյագինցևի ոճին մոտ ֆիլմեր, իսկ այժմ անցել են հեքիաթների՝ միևնույն ժամանակ շարունակելով օգտվել պետական միջոցներից։ Մուսատովը նաև պահանջել է վերջ տալ այն պրակտիկային, երբ «իրենք իրենց են փող տալիս» ֆիլմեր նկարահանելու համար։

Քննարկման ընթացքում պատգամավոր և դերասան Դմիտրի Պևցովը քննադատել է «Չեբուրաշկա» ֆիլմը՝ հայտարարելով, որ այն բացասաբար է ազդում երեխաների վրա, մինչդեռ պատգամավոր և երգիչ Դենիս Մայդանովը պաշտպանել է ընտանեկան կինոն՝ նշելով, որ որոշ նախագծեր պարզապես դարձել են շահույթի աղբյուր՝ ինչպես «բուրատինաների» և «բրեմենյան երաժիշտների» «չափազանցված» տարբերակները։ Դերասանուհի Ելենա Դրապեկոն իր հերթին աջակցել է ստեղծագործական գործընթացում Մշակույթի նախարարության ավելի ակտիվ միջամտությանը՝ առաջարկելով փոխել մշակույթի մասին օրենքի համապատասխան դրույթը։ Ավելի վաղ Մարիա Շուկշինան նույնպես դժգոհություն էր հայտնել՝ նշելով, որ պետական ֆինանսավորումը տարիներ շարունակ ստանում են նույն պրոդյուսերական ընկերությունները, մինչդեռ բազմաթիվ տաղանդավոր ռեժիսորներ մնում են առանց աջակցության, հայտնում է Lenta.ru-ն։