ԱՄՆ–Իրան պատերազմը հնարավոր է, բայց սանձող գործոնները դեռ ուժի մեջ են՝ գնահատում է փորձագետը

ԱՄՆ-ի և Իրանի միջև ռազմական բախման հավանականությունը լիովին բացառել չի կարելի, սակայն այս փուլում գոյություն ունեն մի շարք գործոններ, որոնք զսպում են իրավիճակի սրումը։ «Լենտա.ռու»-ին տված մեկնաբանությունում նման կարծիք է հայտնել քաղաքականագետ-ամերիկագետ Մալեկ Դուդակովը՝ ընդգծելով, որ Վաշինգտոնում դեռ չկա միանշանակ աջակցություն ուժային սցենարին։

Նրա խոսքով՝ ԱՄՆ հասարակական կարծիքը չի աջակցում Իրանի դեմ պատերազմին, իսկ վերջին շրջանում ամերիկյան ռազմական ռեսուրսների զգալի մասը դուրս է բերվել Մերձավոր Արևելքից։ Դուդակովը նշել է, որ լուրջ էսկալացիայի դեպքում Իրանը կարող է կրկին հարվածել տարածաշրջանում գտնվող ամերիկյան ռազմաբազաներին, որոնց պաշտպանությունը կդառնա բարդ խնդիր։ Դա կպահանջի հակաօդային պաշտպանության համակարգերի և սակավ ռեսուրս հանդիսացող հրթիռների շտապ տեղափոխում՝ թուլացնելով այլ ուղղություններ, այդ թվում՝ Ուկրաինան և Ասիան։

Փորձագետի գնահատմամբ՝ նման սցենարը չի տեղավորվում ԱՄՆ գործող ազգային անվտանգության ռազմավարության մեջ, որը հաստատվել է աշնանը և որտեղ Մերձավոր Արևելքը համարվում է ոչ առաջնահերթ տարածաշրջան՝ համեմատած Ասիայի և Լատինական Ամերիկայի հետ։ Միևնույն ժամանակ նա զգուշացրել է, որ Իրանում շարունակվող բողոքի ցույցերի պարագայում ռազմական հակամարտության հավանականությունը կաճի, իսկ դրա հետևանքները կարող են անկանխատեսելի լինել թե՛ ԱՄՆ-ի, թե՛ ողջ Մերձավոր Արևելքի համար։