Որոշ օտարերկրյա բրենդներ կարող են վերադառնալ Ռուսաստան մոտ մեկուկես տարվա ընթացքում

Օտարերկրյա բրենդների վերադարձի ժամկետները Ռուսաստան կախված են թե՛ գործող պատժամիջոցներից, թե՛ շուկա վերադառնալու համար պահանջվող ծախսերից։ Այդ մասին NEWS.ru-ին հայտնել է Ռուսաստանի կառավարությանն առընթեր Ֆինանսական համալսարանի դոցենտ Պետր Շչերբաչենկոն։

Նրա խոսքով՝ բազմաթիվ միջազգային ընկերություններ փորձում են պահպանել իրենց ապրանքային նշանները Ռուսաստանում, սակայն վերադարձի դեպքում կհանդիպեն փոխված շուկայի իրականությանը։ Այդ ընթացքում ազատված շուկայի հատվածները զբաղեցրել են ռուսական և «բարեկամական» երկրների ընկերությունները։ Միևնույն ժամանակ այն բրենդներին, որոնց արտադրանքը ռուս սպառողները հիշում և պատրաստ են կրկին գնել, անհրաժեշտ կլինի մոտ մեկից մինչև մեկուկես տարի՝ գործունեությունը լիարժեք վերականգնելու համար։

Շչերբաչենկոն ընդգծել է, որ վերադարձը հնարավոր է, սակայն կպահանջի զգալի ֆինանսական ռեսուրսներ և հարմարում նոր պայմաններին։ Իսկ Ռուսաստանի արդյունաբերողների և գործարարների միության ղեկավար Ալեքսանդր Շոխինի խոսքով՝ որոշ օտարերկրյա ընկերություններ արդեն գրանցում են իրենց բրենդները Ռուսաստանում՝ հիմնականում ապրանքային նշանների իրավական պաշտպանությունն ապահովելու նպատակով, սակայն նա հավելել է, որ Ռուսաստան վերադառնալ ցանկացող ընկերությունների «հերթ» ներկայումս չկա։