Ռուսաստանի ռազմածովային հատուկ ջոկատը օգտագործում է «Գրաչոնոկ» հակադիվերսիոն կատերներ

Ռուսաստանի ռազմածովային ուժերի ստորջրյա հատուկ ստորաբաժանումների՝ ՊԴՍՍ-ի (ստորջրյա դիվերսիոն ուժեր և միջոցներ) ջրասուզակ-հետախույզները իրենց առաջադրանքների համար կիրառում են «Գրաչոնոկ» նախագծի կատերներ և տարբեր տեսակի նավակներ։ Այդ մասին գրում է «Կրասնայա զվեզդա» թերթը՝ ներկայացնելով ստորջրյա հատուկ ստորաբաժանումների տեխնիկական ապահովումը։

Նշվում է, որ Հյուսիսային նավատորմի ՊԴՍՍ ստորաբաժանումների հիմնական խնդիրներն են նավերի և նավահանգիստների ստուգումը, ինչպես նաև վտանգավոր առարկաների որոնումն ու վնասազերծումը։ Ջրային տարածքների մշտադիտարկման ընթացքում մարտական լողորդները կիրառում են արագընթաց կատերներ և կոշտ հատակով փչովի նավակներ, իսկ ափամերձ գոտիների պարեկությունն իրականացվում է հենց 21980 նախագծի «Գրաչոնոկ» հակադիվերսիոն կատերներով։

Հրապարակման համաձայն՝ Հյուսիսային նավատորմի կազմում առկա են մի քանի նման կատերներ, որոնք հագեցած են ստորջրյա աշխատանքների համար նախատեսված բազմաֆունկցիոնալ սարքավորումներով՝ ներառյալ մինչև 200 մետր խորության վրա հատակի հեռակառավարվող հետազոտության հնարավորությունը։ Հայտնի է, որ առաջին «Գրաչոնոկ»-ը կառուցվել է 2008 թվականին, իսկ մինչ օրս ՌԴ ռազմածովային ուժերին փոխանցվել է 28 նման կատեր, որոնք համալրված են որոնողական և ստորջրյա հետազոտական համալիրներով։