Հայտնի հեռուստահաղորդավարուհին խոստովանել է՝ դեմքի սպիները խաթարել են իր ինքնավստահությունը

Բրիտանացի հայտնի սպորտային հեռուստահաղորդավարուհի Լորա Վուդսը պատմել է, որ դեմքի սպիների պատճառով բախվել է ինքնավստահության խնդիրների։ Այդ մասին նա հայտնել է Instagram-ի իր էջում հրապարակված պատմություններում՝ բացահայտ խոսելով արտաքինի հետ կապված իր ապրումների մասին։

Վուդսի խոսքով՝ սպիները մնացել են 2024 թվականին՝ փեսացուի հետ հանգստի ընթացքում տեղի ունեցած դժբախտ պատահարից հետո։ Նա նշել է, որ ստացել է դեմքի վնասվածքներ, որոնց հետևանքները մինչ օրս փորձում է վերացնել՝ լազերային բուժման միջոցով։ Հեռուստահաղորդավարուհին ընդգծել է, որ այդ գործընթացը և՛ ցավոտ է, և՛ թանկարժեք։

Նրա խոստովանմամբ՝ սպիները հատկապես նկատելի են լուսանկարներում՝ ժպտալու կամ դեմքի արտահայտությունները փոխելու ժամանակ, ինչը բացասաբար է ազդել իր ինքնավստահության վրա։ Սակայն Վուդսը նշել է, որ երեխայի ծնունդը օգնել է փոխել առաջնահերթությունները և ավելի քիչ կենտրոնանալ արտաքինի վրա՝ գտնելով ներքին հավասարակշռություն։