Սմարթֆոնները կթանկանան․ արտադրողները մեղադրում են արհեստական բանականությանը

Սմարթֆոնների գները 2026 թվականին կարող են զգալիորեն աճել՝ արհեստական բանականության արագ զարգացման պատճառով։ Այդ մասին X սոցիալական ցանցում հայտնել է Nothing ընկերության ղեկավար Կառլ Փեյը՝ նշելով, որ սպառողական էլեկտրոնիկայի շուկան կանգնած է աննախադեպ փոփոխությունների առաջ։

Փեյի խոսքով՝ շուրջ 15 տարի սմարթֆոնների ինդուստրիան հիմնված էր այն համոզման վրա, որ բաղադրիչների արժեքը ժամանակի ընթացքում կնվազի, սակայն այդ միտումը այլևս չի գործում։ Նա ընդգծել է, որ հիշողության չիպերի գները կտրուկ աճել են, քանի որ դրանք մեծ քանակությամբ գնում են տվյալների կենտրոնները՝ արհեստական բանականության ծառայությունների պահանջները բավարարելու համար։ Արդյունքում հիշողությունը, որի արժեքը արդեն եռապատկվել է, դարձել է սմարթֆոնների ամենաթանկ բաղադրիչներից մեկը։

Հոդվածում նշվում է, որ արտադրողները կանգնած են բարդ ընտրության առաջ՝ կամ բարձրացնել սարքերի գները մինչև 30 տոկոսով, կամ նվազեցնել տեխնիկական հնարավորությունները։ Կառլ Փեյը վստահեցրել է, որ Nothing-ը կփորձի պահպանել իր արտադրանքի գները ընդունելի մակարդակի վրա՝ նոր մոտեցումների և դիզայնի հաշվին։ Ավելի վաղ Xiaomi-ի ղեկավար Լու Վեյբինգը նույնպես հայտարարել էր, որ ընկերության ֆլագման սմարթֆոնների միջին գինը առաջիկայում զգալիորեն կբարձրանա։