Ասիայի ամենաթանկ ընկերությունը գրանցել է ռեկորդային շահույթ

Ասիայի ամենաթանկ ընկերությունը և աշխարհում արհեստական բանականության համար նախատեսված չիպերի խոշորագույն արտադրողը՝ Taiwan Semiconductor Manufacturing Co. (TSMC), 2025 թվականի չորրորդ եռամսյակում արձանագրել է շահույթի 35 տոկոս աճ։ Reuters-ի փոխանցմամբ՝ ընկերության մաքուր շահույթը տարվա վերջին երեք ամիսներին հասել է ռեկորդային 505,7 մլրդ թայվանական դոլարի, կամ մոտ 16 մլրդ ԱՄՆ դոլարի։

TSMC-ի տվյալներով՝ սա դարձել է երկնիշ աճի արդեն յոթերորդ անընդմեջ եռամսյակը։ Ընկերությունը կանխատեսում է, որ 2026 թվականի առաջին եռամսյակում եկամուտը կարող է աճել մինչև 40 տոկոսով՝ նախորդ տարվա նույն ժամանակահատվածի համեմատ և կազմել շուրջ 35,8 մլրդ դոլար։ Աճի հիմնական շարժիչ ուժը շարունակում է մնալ արհեստական բանականության ոլորտում չիպերի բարձր պահանջարկը։

Միևնույն ժամանակ ԱՄՆ առևտրի նախարար Հովարդ Լյութնիկը հայտարարել է, որ TSMC-ն մտադիր է ավելացնել ներդրումները ամերիկյան տնտեսությունում։ Ըստ աղբյուրների՝ Սպիտակ տունը մոտ է Թայվանի հետ առևտրային համաձայնության կնքմանը, որը նախատեսում է մաքսատուրքերի նվազեցում, սակայն փոխարենը պահանջում է, որ TSMC-ն Արիզոնայում կառուցի առնվազն հինգ նոր արտադրական գործարան։