Գիտնականները զգուշացրել են՝ երկար ժամանակ հարաբերություններ չունենալը վնասում է հոգեկան վիճակը

Երիտասարդ տարիքում երկար ժամանակ ռոմանտիկ հարաբերությունների բացակայությունը կարող է բացասաբար ազդել մարդու հոգեբանական բարեկեցության վրա։ Այս եզրակացությանն են եկել Ցյուրիխի համալսարանի գիտնականները՝ վերլուծելով Գերմանիայից և Մեծ Բրիտանիայից ավելի քան 17 հազար երիտասարդների տվյալներ։ Հետազոտության արդյունքները հրապարակվել են Journal of Personality and Social Psychology (JPSP) գիտական ամսագրում։

Ուսումնասիրության մասնակիցները 16 տարեկանում չունեին հարաբերությունների փորձ և մինչև 29 տարեկանը ամեն տարի մասնակցել են հարցումներին։ Վերլուծությունը ցույց է տվել, որ միջինում ավելի երկար ժամանակ առանց զուգընկեր են մնում տղամարդիկ, բարձր կրթություն ունեցողները և նրանք, ովքեր դեռ երիտասարդ տարիքում իրենց բարեկեցությունը գնահատել են որպես ցածր։ Հեղինակների խոսքով՝ կրթությանն ու կարիերային կենտրոնանալը հաճախ ուղեկցվում է անձնական հարաբերությունների հետաձգմամբ։

Ժամանակի ընթացքում տարբերությունները ավելի ակնհայտ են դարձել․ երկար ժամանակ միայնակ մնացածների մոտ նվազել է կյանքի բավարարվածությունը, ուժեղացել է միայնության զգացումը, իսկ մոտ 30 տարեկանում ավելի հաճախ են ի հայտ եկել դեպրեսիվ նշաններ։ Միևնույն ժամանակ առաջին հարաբերությունների սկիզբը հիմնականում ուղեկցվել է ինքնազգացողության բարելավմամբ՝ կյանքի բավարարվածության աճով և միայնության նվազումով՝ ինչպես կարճաժամկետ, այնպես էլ երկարաժամկետ հեռանկարում։