Հուշագիրը գործողության մեջ

Հունվարի 27-ին Արտակարգ իրավիճակների նախարարության և «Հարավկովկասյան երկաթուղի» ՓԲԸ մասնագետները համատեղ ուժերով կազմակերպելու են Երևան-Գյումրի հատվածի երկաթուղային ենթակառուցվածքի զննում: ՀԿԵ ՓԲԸ կողմից զննմանը մասնակցելու են ղեկավար կազմի ներկայացուցիչներ՝ Ընկերության գլխավոր տնօրենի պաշտոնակատար Մարատ Խակովի գլխավորությամբ:

Երևան-Գյումրի հատվածի երկաթուղային ենթակառուցվածքի զննումը կազմակերպվում է երկաթուղուն սպառնացող ռիսկերը բացահայտելու և դրանք նվազեցնելու համար արդյունավետ միջոցառումներ կազմակերպելու նպատակով։

2011 թ. դեկտեմբերի 6-ին Հայաստանի Հանրապետության արտակարգ իրավիճակների նախարար Արմեն Երիցյանը և ՀԿԵ ՓԲԸ գլխավոր տնօրեն Շևկետ Շայդուլլինը ստորագրեցին Համագործակցության մասին հուշագիր։

Համաձայն Հուշագրի՝ Արտակարգ իրավիճակների նախարարությունը և «Հարավկովկասյան երկաթուղի» ՓԲԸ–ն կհամագործակցեն հետևյալ ոլորտներում.

• Տեխնածին վթարների, տարերային աղետների կանխարգելում, դրանց հնարավոր հետևանքների նվազեցում և վերացում.

• Տեխնածին վթարների և տարերային աղետների կանխատեսում, մոնիտորինգ և վաղ ազդարարում.

• Բնակչության իրազեկում և պատրաստվածության բարձրացում.

• Քաղաքացիական պաշտպանության ոլորտում համատեղ գործունեություն.

• Արագ արձագանքման, վթարավերականգնողական, որոնողափրկարարական, տարհանման և այլ աշխատանքների համատեղ կազմակերպում.

• Կադրերի պատրաստում և վերապատրաստում, ուսումնական բազաների ձևավորում։