Հերթական ոտնձգությունը՝ լրագրողների նկատմամբ․ՊՊԾ աշխատակիցները հեռացրին «Ժողովուրդ»-ի լրագրողներին (տեսանյութ)

Ժողովրդավարության, ազատ խոսքի արժեքներով և լրագրողներով իշխանություն ձևավորած Նիկոլ Փաշինյանի իշխանությունը շարունակում է հետապնդել լրագրողներին և հստակ լրագրողատյաց քաղաքականություն է որդեգրել։

Այսօր ականատես եղանք հերթական նման միջադեպին։ Այսօր պաշտպանության և անվտանգության հարցերի մշտական հանձնաժողովի նիստի ժամանակ «Ժողովուրդ» օրաթերթի խմբագիր Քնար Մանուկյանին և ArmLur.am կայքի խմբագիր Սոնա Գրիգորյանին Անդրանիկ Քոչարյանի ապօրինի հրահանգով դուրս հանեցին նիստերի դահլիճից: Ավելի վաղ Հայկ Կոնջորյանին անցանկալի հարցեր ուղղելու համար լրագրողները զրկվել էին հավատարմագրումից։ Լրագրողները Կոնջորյանին հարց էին ուղղել նրա առանձնատան սկանդալի վերաբերյալ, որը ձեռք էր բերել շուկայականից էժան գնով, ինչը բացահայտվել է հետաքննությամբ: Եվ հետագայում նման «անցանկալի» հարցերը կանխելու նպատակով նա դիմում է գրել ԱԺ աշխատակազմի ղեկավար Դավիթ Առաքելյանին։

Վերջինս, իրավական ընթացակարգերի իմիտացիա ապահովելու նպատակով ըստ էության, հուշել է՝ ինչպես ձևակերպել դիմումը, որպեսզի հնարավոր լինի լրագրողներին զրկել հավատարմագրումից՝ արդյունքում 2 օրում թե՛ նախազգուշացում, և թե՛ զրկման որոշում է կայացնելով։ Բնականաբար, այս ամբողջ գործընթացը տեղի է ունեցել Ազգային ժողովի նախագահ Ալեն Սիմոնյանի անմիջական գլխավորությամբ և համաձայնությամբ, սակայն ՔՊ Կոնջորյանը չէր սահմանափակվել։

Դեկտեմբերի 16-ին, երբ «Ժողովուրդ օրաթերթ»-ի և ArmLur.am-ի լրագրողները հետաքրքրվել են մանիպուլատիվ հնարքներով ձեռք բերված Կոնջորյանի թանկարժեք առանձնատան թեմայով, պատգամավորը դրսևորել է անսանձ զայրույթ և անմիջապես դիմում գրել՝ պահանջելով արգելել լրագրողների մուտքը Ազգային ժողովի տարածք։ Այսօր լրագրողները հանձնաժողովի նիստին ներկա են եղել պատգամավոր Գեղամ Մանուկյանի հրավերով, սակայն Անդրանիկ Քոչարյանի ու ԱԺ աշխատակազմի ղեկավար Դավիթ Առաքելյանի ապօրինի միջամտությամբ ՊՊԾ աշխատակիցները բռնի կերպով նրանց դուրս հանեցին ԱԺ շենքից։