Ռուսաստանը կուժեղացնի Արկտիկայի պաշտպանությունը՝ մարտական սուզորդների շարժական ջոկատներով

Ռուսաստանի զինված ուժերը նախատեսում են Արկտիկայի պաշտպանության համար ներգրավել լրացուցիչ մարտական սուզորդների ուժեր։ Այդ մասին «Իզվեստիա» թերթին հայտնել են իրավիճակին ծանոթ աղբյուրները՝ նշելով, որ համապատասխան ստորաբաժանումները կգործեն Հյուսիսային նավատորմի կազմում։

Աղբյուրների փոխանցմամբ՝ ծրագրավորվում է ձևավորել հատուկ շարժական ջոկատներ՝ ուղղված ստորջրյա դիվերսիոն ուժերի և միջոցների դեմ պայքարին (ՊԴՍՍ)։ Ի տարբերություն արդեն գործող, ռազմածովային բազաներին կցված ջոկատների՝ նոր ստորաբաժանումները կլինեն շարժական և կզբաղվեն ժամանակավոր տեղակայման կետերի, նավերի կանգառների և նավահանգիստների պահպանությամբ։ Ռազմական փորձագետ Դմիտրի Բոլտենկովը «Իզվեստիա»-ին նշել է, որ հյուսիսային լայնություններում դիվերսիոն վտանգը չի կարելի թերագնահատել։

ՊԴՍՍ նախկին հրամանատար, Կալինինգրադի մարզի օրենսդիր ժողովի պատգամավոր Ալեքսեյ Մենդրիկը ընդգծել է, որ Արկտիկայում ջրի ծայրահեղ ցածր ջերմաստիճանի պատճառով նպատակահարմար է հնարավորինս լայն կիրառել ռոբոտացված համակարգեր։ Միաժամանակ նախկին Խաղաղօվկիանոսյան նավատորմի հրամանատար, ծովակալ Սերգեյ Ավակյանցը հայտարարել է, որ ՌԴ ռազմածովային նավատորմի ուժեղացումը արդիական է՝ հաշվի առնելով, որ մոտ ապագայում Գրենլանդիան, նրա խոսքով, կդառնա ամերիկյան և կմիլիտարիզացվի։