Պետդումայում վրդովված են՝ ցարական պարտքերը վերադարձնելու պահանջներից

Ռուսաստանը չի հանդիսանում Ռուսական կայսրության իրավահաջորդը և պարտավոր չէ ճանաչել ցարական իշխանությունների կողմից վերցված պարտքերը։ Այդ մասին հայտարարել է Պետդումայի քաղաքացիական հասարակության զարգացման կոմիտեի փոխնախագահ Սերգեյ Օբուխովը՝ մեկնաբանելով թեման, հաղորդում է RTVI-ն։

Նրա խոսքով՝ Ռուսաստանը հանդիսանում է ԽՍՀՄ իրավահաջորդ պետությունը, իսկ Խորհրդային Միությունը ժամանակին ամբողջությամբ չեղարկել է ցարական Ռուսաստանի պարտքերը և այդ դիրքորոշմանը հավատարիմ է մնացել մինչև իր գոյության ավարտը։ Օբուխովը տարակուսանք է հայտնել, թե ինչու են պարտքերի վճարման պահանջները ներկայացվում հենց Մոսկվային, այլ ոչ թե, օրինակ, Ֆինլանդիային կամ Լեհաստանին, որոնք նույնպես եղել են Ռուսական կայսրության կազմում։

Պատգամավորը նաև ընդգծել է, որ այս պահանջները գործնականում «դատարկ խոսակցություններ» են, քանի որ միջազգային հարաբերություններում այսօր հաճախ գործում է «ով ուժեղ է, նա էլ իրավացի է» սկզբունքը։ Նրա համոզմամբ՝ ցարական պարտքերը չեն կարող ճանաչվել նաև վաղեմության պատճառով։ Ավելի վաղ հայտնի էր դարձել, որ Noble Capital RSD ներդրումային հիմնադրամը հայց է ներկայացրել ԱՄՆ դատարան՝ պահանջելով Ռուսաստանից բռնագանձել կայսերական շրջանի պարտատոմսերի դիմաց գումարներ՝ առաջարկելով դրանք վերցնել սառեցված ռուսական ակտիվներից։