«Տանը մենակ» ֆիլմի աստղը հեռացվել է նախագծից աղմկահարույց մեղադրանքների ֆոնին

Ամերիկացի դերասան Դենիել Սթերնը, որը հայտնի է «Տանը մենակ» ֆիլմերում անհաջողակ գող Մարվ Մերչինսի դերով, զրկվել է հեռուստասերիալում նախատեսված իր դերից՝ նրան ներկայացված մեղադրանքների պատճառով։ Այդ մասին հայտնում է Deadline-ը՝ նշելով, որ խոսքը վերաբերում է ABC հեռուստաընկերության նոր նախագծին։

Սթերնը դերի համար հաստատվել էր 2025 թվականի դեկտեմբերին, սակայն ստուդիան որոշել է դադարեցնել համագործակցությունը և նոր քասթինգ անցկացնել՝ դերասանի փոխարինող գտնելու համար։ Որոշումը կայացվել է դերասանի շուրջ ծագած իրավական սկանդալի ֆոնին, որը լայն արձագանք է ստացել ամերիկյան մամուլում։

Միջադեպը տեղի է ունեցել 2025 թվականի դեկտեմբերին Կալիֆոռնիայում գտնվող հյուրանոցում, որտեղ, ըստ իրավապահների, դերասանը փորձել է պայմանավորվել սեքս-աշխատողի հետ։ Ոստիկանության միջամտությունից հետո Սթերնին մեղադրանք է ներկայացվել մարմնավաճառության դրդման հոդվածով։ Լրատվամիջոցների տվյալներով՝ նրան կարող է սպառնալ մինչև վեց ամիս ազատազրկում և հազար դոլար տուգանք։