Արևմուտքում գնահատել են ռուսական «HIMARS-ի ոչնչացնող» նոր անօդաչուն

Արևմտյան Defence Blog (DB) պարբերականը անդրադարձել է ռուսական նոր ռեակտիվ դրոն-կամիկաձեին, որը, ըստ հրապարակման, կարող է արագորեն խոցել կարևոր և շարժական թիրախներ մեծ հեռավորություններից։ Խոսքը գնում է այն անօդաչուի մասին, որը, հրապարակված կադրերի համաձայն, ոչնչացրել է Ուկրաինայի զինված ուժերի HIMARS համազարկային կրակի ռեակտիվ համակարգը։

DB-ի ուշադրությունը գրավել է տեսանյութը, որտեղ երևում է, թե ինչպես է ռեակտիվ շարժիչով և սլաքաձև թևով դրոն-կամիկաձեն բարձր արագությամբ հարվածում շարժվող HIMARS-ին Չեռնիգովի մարզի մի գյուղում՝ Ռուսաստանի Բրյանսկի մարզի սահմանից մոտ 50 կիլոմետր հեռավորության վրա։ Հետախուզական անօդաչուի նկարահանած կադրերը դարձել են տվյալ սարքի առաջին հաստատված ի հայտ գալը ռազմական գործողությունների գոտում։

Պարբերականը նշում է, որ ցուցադրված արագությունը վկայում է՝ դրոնը կարող է արագ կիրառվել թիրախի հայտնաբերումից հետո, ինչը մեծացնում է «կրակիր ու հեռացիր» մարտավարություն կիրառող շարժական համակարգերի խոցման հավանականությունը։ Defence Blog-ը նաև ընդգծում է, որ մինչ այժմ նման առաջնահերթ թիրախների համար կիրառվում էին «Իսկանդեր-Մ» բալիստիկ հրթիռները, մինչդեռ նոր անօդաչուի ի հայտ գալը կարող է էապես նվազեցնել նման տեխնիկայի ոչնչացման արժեքը։