Գրանցվել է բացառիկ դեպք․ պումայի հարձակումը մարդու վրա մահացու ելքով

ԱՄՆ Կոլորադո նահանգում պուման մարդ է սպանել առաջին անգամ վերջին 26 տարիների ընթացքում։ Այդ մասին հայտնում է The Longmont Leader-ը՝ հղում անելով տեղի իշխանություններին և վայրի բնության պահպանության ծառայությանը։

Ըստ հրապարակման՝ 46-ամյա Քրիստեն Կովաչը հունվարի 1-ին մեկնել է զբոսաշրջային արահետով արշավի և այլևս չի վերադարձել։ Ավելի ուշ նրա մարմինը հայտնաբերվել է առանց կյանքի նշանների։ Դատաբժշկական փորձաքննությունը ցույց է տվել, որ կնոջ մահվան պատճառը դարձել է վայրի գիշատչի հարձակումը, իսկ հետաքննության արդյունքում հաստատվել է, որ նրա վրա հարձակվել է պումա։

Դեպքի վայրի շրջանում նկատվել են երեք պումա, որոնցից երկուսը՝ էգը և արուն, վնասազերծվել են։ Արուի թաթերի վրա հայտնաբերվել է մարդկային ԴՆԹ։ Կոլորադոյի վայրի բնության պահպանության վարչությունում նշել են, որ որոշումը դժվար է եղել, սակայն անհրաժեշտ՝ մարդկանց անվտանգությունն ապահովելու համար։ Կովաչը դարձել է առաջին մարդը նահանգում 1999 թվականից ի վեր, որը զոհվել է պումայի հարձակման հետևանքով։ Ընդհանուր առմամբ Կոլորադոյում ապրում է մոտ 4 հազար պումա, և նման դեպքերը համարվում են չափազանց հազվադեպ, թեև 2025 թվականի աշնանից ի վեր արդեն արձանագրվել է հինգ հարձակում։