Պետդումայում կասկածի տակ են դրել ԱՄՆ-ում ներկայացված հայցի հեռանկարները՝ ցարական պարտքերի շուրջ

Ռուսաստանում արձագանքել են ԱՄՆ դատարանում ներկայացված հայցին, որով Noble Capital RSD ներդրումային հիմնադրամը փորձում է Ռուսաստանից բռնագանձել Ռուսական կայսրության ժամանակների պարտքերը։ Պետդումայի տնտեսական քաղաքականության կոմիտեի առաջին փոխնախագահ Դենիս Կրավչենկոյի խոսքով՝ այդ հայցը գրեթե չի կարող ունենալ իրավական հեռանկար, գրում է «Լենտա.ռու»-ն։

Կրավչենկոն ընդգծել է, որ Ռուսաստանի Դաշնությունը իրավական առումով չի հանդիսանում Ռուսական կայսրության իրավահաջորդը։ Նրա հիշեցմամբ՝ 2020 թվականից երկրի Սահմանադրությամբ ամրագրված է Ռուսաստանի իրավահաջորդությունը ԽՍՀՄ-ին, սակայն ոչ՝ կայսրությանը։ Բացի այդ, նա նշել է, որ Ռուսաստանը դեռևս 2006 թվականին ամբողջությամբ մարել է իր պատմական պարտքերը Փարիզյան ակումբի առջև, ինչն ընդունվել է միջազգային հանրության կողմից։

Պատգամավորը նաև տարակուսանք է հայտնել, որ հայցը ներկայացրել է Տեխասում գրանցված ներդրումային հիմնադրամը, որը ստեղծվել է միայն 2002 թվականին և հիմնականում զբաղվում է անշարժ գույքով։ Նրա խոսքով՝ եթե նույնիսկ նման պարտքերի հարց բարձրացվի, ապա այն պետք է վերաբերի ոչ միայն Ռուսաստանին, այլև նախկին Ռուսական կայսրության կազմում եղած այլ պետություններին։ Ավելի վաղ հայտնի էր դարձել, որ Noble Capital RSD-ն պահանջում է շուրջ 225,8 միլիարդ դոլար՝ առաջարկելով գումարը բռնագանձել սառեցված ռուսական ակտիվներից։