Որպեսզի Հայաստանը չդառնա հումքային կցորդ

Այսօր լրագրողների հետ հանդիպման ավարտին, ԼՈՒՐԵՐ.com–ի թղթակիցը Թեղուտի հանքի շահագործման և մի քանի այլ հարցերի շուրջ զրուցեց բնապահպան–ակտիվիստ Ապրես Զոհրաբյանի հետ։ Մասնավորապես՝ մեր թղթակիցը հետաքրքրվեց, թե ինչպիսին է բնապահպանների հստակ դիրքորոշումը Թեղուտի հանքի շահագործման վերաբերյալ. բնապահպանները դեմ են հանքի բաց շահագործմանը, թե՝ հանքի շահագործմանն առհասարակ։ Հարցին ի պատասխան՝ Ա. Զոհրաբյանը նշեց. «Որպեսզի Հայաստանը չդառնա հումքային կցորդ. ես ավելի շատ այս դիտանկյունից եմ դեմ Թեղուտի հանքի շահագործմանը»։ Իսկ հումքային կցորդ հանդիսացող երկրները, բնապահպանի համոզմամբ, որպես կանոն չորրորդ կարգի երկրներ են, որոնք ունեն բացմաթիվ բնապահպանական, առողջապահական, սոցիալ–տնտեսական խնդիրներ։

Չնայած որ երկրի տնտեսական քաղաքականության համար պատասխանատու մարմիններ կան, բայց բնապահպանները ևս, մտահոգված լինելով այս խնդրով, կազմակերպել են քննարկումներ այդ խնդրի շուրջ, որպեսզի ներդրումներ կատարվեն Թեղուտ–Շնողի շրջանում՝ ոչ հանքարդյունաբերական ձեռնարկություններում։