Մոսկվայում կոտրել են Անա Պոլիտկովսկայայի հուշատախտակը

Մոսկվայի Լեսնայա փողոցում անհայտ անձինք կոտրել են «Новая газета»-ի լրագրող Անա Պոլիտկովսկայայի հուշատախտակը: Այս մասին Telegram-ալիքում հայտնել է Զյուզինո մունիցիպալ շրջանի նախկին պատգամավոր Ալեքսանդր Զամյատինը: Հուշատախտակը տեղադրված էր 8/12 տան վրա, որտեղ ապրել և սպանվել է Պոլիտկովսկայան:

Զամյատինը գրառմանը կցել է Լեսնայա փողոցի տան մուտքի մոտ արված երկու լուսանկար: Դրանցում երևում է, որ տախտակը բազմաթիվ մասերի է բաժանվել: Բեկորներն ընկած են շենքի մուտքի մոտ: Դրանց մեջ են նաև հուշատախտակի մոտ բերված ծաղիկները: Նախկինում հուշատախտակի վրա գրված էր. «Այս տանն ապրել և 2006 թվականի հոկտեմբերի 7-ին դաժանաբար սպանվել է Անա Պոլիտկովսկայան»:

«Новая газета»-ի խմբագրությունը միջադեպն անվանել է վանդալիզմ: Ըստ թերթի Telegram-ալիքի, աշխատակիցները և Պոլիտկովսկայայի երեխաները պահանջում են քրեական գործ հարուցել:

Անա Պոլիտկովսկայային գնդակահարել են սեփական տան վերելակում: Լրագրողի սպանության գործով կազմակերպիչներն ու կատարողները դատապարտվել են տարբեր պատժաչափերի, այդ թվում՝ ցմահ ազատազրկման: Պատվիրատուն մինչև օրս հայտնաբերված չէ: 2021 թվականի աշնանն այս գործով վաղեմության ժամկետը լրացել է:

Լրագրողը «Новая газета»-ում աշխատել է 1999 թվականից: Անա Պոլիտկովսկայան բազմիցս մեկնել է մարտական գործողությունների գոտիներ, ռեպորտաժներ վարել Չեչնիայից և զբաղվել իրավապաշտպան գործունեությամբ: Նա օգնել է զոհված զինվորների մայրերին և «Նորդ-Օստի» զոհերին, գրում է «Коммерсантъ»-ը: