Ամուսնությունների թվի բարձրացումը ակտիվացրել է Չինաստանի հարսանեկան բիզնեսը

Չինաստանի Սուչժոու քաղաքի Huqiu Bridal City հարսանեկան շուկայի վաճառողները հույս ունեն, որ երկրում ամուսնությունների աճի միտումը կշարունակվի նաև 2026 թվականին։ Reuters-ի փոխանցմամբ՝ 2025 թվականի առաջին ինը ամիսներին ամուսնությունների թիվը աճել է 8,5 տոկոսով, ինչը դրական բացառություն է Չինաստանի ընդհանուր ժողովրդագրական անկման ֆոնին, երբ ծնելիությունը հասել է պատմական նվազագույնի, իսկ բնակչությունը նվազում է արդեն չորրորդ տարին անընդմեջ։

Վաճառողների խոսքով՝ ամուսնությունների աճին նպաստել են ինչպես մշակութային գործոնները, այնպես էլ պետական քաղաքականության փոփոխությունները։ Մասնավորապես, 2025 թվականի մայիսից ուժի մեջ մտածած նոր կարգավորումը թույլ է տալիս զույգերին ամուսնանալ երկրի ցանկացած հատվածում՝ անկախ գրանցման վայրից։ Բացի այդ, 2024 թվականը համարվել է «անբարենպաստ» ամուսնության համար, ինչի պատճառով բազմաթիվ զույգեր իրենց հարսանիքները հետաձգել են մինչև 2025 թվականը, որը համարվում է բարենպաստ՝ ըստ չինական կենդանակերպի։

Այնուամենայնիվ, շուկայի ներկայացուցիչները նշում են, որ տնտեսական վիճակն ավելի վճռորոշ դեր ունի, քան կոնկրետ խրախուսական ծրագրերը։ Երիտասարդների շրջանում ամուսնության նկատմամբ հետաքրքրության նվազումը պայմանավորված է բարձր ծախսերով՝ բնակարան, կրթություն և երեխաների խնամք։ Չնայած որոշ շրջաններում նորապսակներին տրամադրվում են ֆինանսական վաուչերներ, վաճառողները ընդգծում են, որ մարդկանց վստահությունը ապագայի հանդեպ և տնտեսության կայունացումը առանցքային գործոններ են՝ թե՛ ամուսնանալու որոշման, թե՛ հարսանեկան ծախսերի մակարդակի համար։