Եվրոպան կոշտ արձագանքել է Թրամփի մաքսատուրքերի սպառնալիքներին

Եվրոպական առաջնորդները դատապարտել են ԱՄՆ նախագահ Դոնալդ Թրամփի սպառնալիքները՝ մաքսատուրքեր սահմանելու այն երկրների նկատմամբ, որոնք կդիմադրեն Գրենլանդիայի նկատմամբ նրա հավակնություններին։ Al Jazeera-ի փոխանցմամբ՝ Դանիան, Ֆինլանդիան, Ֆրանսիան, Գերմանիան, Նիդերլանդները, Նորվեգիան, Շվեդիան և Մեծ Բրիտանիան համատեղ հայտարարությամբ ընդգծել են, որ լիակատար համերաշխության մեջ են Դանիայի և Գրենլանդիայի ժողովրդի հետ՝ պաշտպանելով ինքնիշխանության և տարածքային ամբողջականության սկզբունքները։

Հայտարարության մեջ նշվում է, որ մաքսատուրքերի սպառնալիքները վտանգում են անդրատլանտյան հարաբերությունները և կարող են հանգեցնել «վտանգավոր իջնող պարույրի»։ Եվրոպական խորհրդի նախագահ Անտոնիու Կոշտան հայտարարել է, որ ԵՄ-ն պատրաստ է պաշտպանվել ցանկացած տեսակի ճնշումից, իսկ առաջիկա օրերին սպասվում են արտակարգ քննարկումներ՝ հնարավոր պատասխան քայլերը համակարգելու համար, այդ թվում՝ պատասխան մաքսատուրքեր և սահմանափակումներ ամերիկյան ընկերությունների նկատմամբ։

Թրամփը հայտարարել է, որ փետրվարի 1-ից նշված ութ երկրներին կսպառնա 10 տոկոս մաքսատուրք, որը հունիսի 1-ից կբարձրանա մինչև 25 տոկոս՝ մինչև ԱՄՆ-ը չհասնի Գրենլանդիայի «ձեռքբերման» վերաբերյալ համաձայնության։ Այս դիրքորոշումը խորացրել է ԱՄՆ–Եվրոպա հարաբերությունների ճգնաժամը և մտահոգություններ առաջացրել ՆԱՏՕ-ի ապագայի շուրջ, մինչ Դանիան կտրականապես մերժում է Գրենլանդիայի վաճառքը, իսկ կղզու բնակչության մեծ մասը հանդես է գալիս ԱՄՆ-ին միանալու դեմ։