Ավտոմասնագետը նշել է վարորդների ձմեռային ամենատարածված սխալները

Ձմռան ամիսներին ավտոմեքենաների խափանումների, վթարային իրավիճակների և ավելորդ ծախսերի հիմնական պատճառներից մեկը վարորդների սխալ վարքագիծն է։ Այդ մասին «Российская газета»-ին տված մեկնաբանությունում հայտնել է Tamashi ավտոմոբիլային բրենդի փորձագետ Կոնստանտին Օժոգինը՝ ընդգծելով, որ տարիներ շարունակ ավտոմոբիլիստները կրկնում են նույն սխալները։

Փորձագետի խոսքով՝ ամենատարածված մոլորություններից մեկը շարժիչը երկար ժամանակ տեղում աշխատեցնելն է՝ այն «տաքացնելու» նպատակով։ Օժոգինը նշել է, որ ժամանակակից ավտոմեքենաների դեպքում բավական է մոտ 30 վայրկյան, որպեսզի յուղը սկսի շրջանառվել, իսկ առավել ճիշտ է շարժումը սկսել հանգիստ՝ խուսափելով կտրուկ արագացումներից։ Նա նաև զգուշացրել է, որ սառը մեքենայով ագրեսիվ վարելը արագացնում է փոխանցման համակարգի ու կախոցի մաշվածությունը և մեծացնում սահքի վտանգը, հատկապես սառցակալած ճանապարհներին։

Օժոգինը «Российская газета»-ին նաև հիշեցրել է ձմռանը անվադողերի ճնշման հաճախակի ստուգման, մարտկոցի կանխարգելիչ զննման և անվտանգ ապասառեցման կարևորության մասին։ Նրա խոսքով՝ տաք ջրով ապակիները մաքրելը կարող է առաջացնել ճաքեր, իսկ սառած մաքրիչները միացնելը՝ վնասել համակարգը։ Բացի այդ, փորձագետը վտանգավոր է համարել մեքենայի տանիքին ու կափարիչին ձյուն թողնելը, ինչպես նաև վառելիքի նվազագույն մակարդակով երթևեկելը՝ ընդգծելով, որ ձմեռը վարորդից պահանջում է ոչ թե հերոսություն, այլ ուշադրություն և կարգապահություն։