Qantas-ի ինքնաթիռը երկու անգամ վերադարձել է օդանավակայան՝ օդում տեղի ունեցած միջադեպերի պատճառով

Ավստրալիայում Qantas ավիաընկերության ուղևորատար ինքնաթիռը մեկ թռիչքի ընթացքում երկու անգամ ստիպված է եղել վերադառնալ Ադելաիդայի օդանավակայան։ Այդ մասին հայտնում է People-ը։ Միջադեպը տեղի է ունեցել հունվարի 18-ի առավոտյան՝ Պորտ Լինքոլն ուղևորվող չվերթի ժամանակ։

People-ի փոխանցմամբ՝ առաջին վերադարձը պայմանավորված է եղել թռչնի հետ բախմամբ․ ինքնաթիռը վայրէջք է կատարել մեկնարկից մոտ մեկ ժամ անց և ևս մեկ ժամ մնացել է գետնին։ Թռիչքից առաջ ինքնաթիռը ենթարկվել էր ստուգման, սակայն երկրորդ փորձի ընթացքում օդում ի հայտ է եկել նոր խնդիր։

Երկրորդ վերելքից հետո ինքնաթիռում արձանագրվել է գեներատորի խափանում, ինչի հետևանքով այն կրկին վայրէջք է կատարել Ադելաիդայում։ Ի վերջո ինքնաթիռը փոխարինվել է, և ուղևորները մեկնարկել են միայն ժամը 14։00-ին՝ շուրջ վեց ժամ ուշացումով, հայտնում է People-ը։ Ավելի վաղ Ավստրալիայում գրանցվել էր ևս մեկ դեպք, երբ ուղևորատար ինքնաթիռը վնասվել էր թռիչքուղու վրա կենգուրուի հետ բախման հետևանքով։