Բացահայտվել է ԵՄ-ի քայլը՝ ԱՄՆ-ին զսպելու համար Գրենլանդիայում

Եվրամիության երկրների զինվորականների տեղակայումը Գրենլանդիայում նպատակ է ունեցել զսպել ԱՄՆ-ին․ այդ մասին գրում է The Wall Street Journal-ը՝ հղում անելով եվրոպացի անանուն պաշտոնյայի։ Ըստ աղբյուրի՝ Ֆրանսիան, Դանիան և մի շարք այլ եվրոպական երկրներ զինծառայողներ են ուղարկել կղզի՝ ցույց տալու համար, որ Վաշինգտոնի հնարավոր քայլերը Գրենլանդիայում կարող են բարձր «գին» ունենալ։

Պաշտոնապես զորքերի տեղակայումը ներկայացվել է որպես ուսումնական զորավարժություններ՝ ուղղված Արկտիկական կղզու պաշտպանությանը Ռուսաստանի և Չինաստանի հնարավոր սպառնալիքներից։ Սակայն WSJ-ի աղբյուրի փոխանցմամբ՝ իրական նպատակը եղել է ստեղծել զսպող գործոն հենց Միացյալ Նահանգների նկատմամբ։

Ավելի վաղ հաղորդվել էր, որ Ֆրանսիան դիմել է ՆԱՏՕ-ին՝ առաջարկելով Գրենլանդիայում ռազմական զորավարժություններ անցկացնել։ Քայլը հաջորդել է ԱՄՆ նախագահ Դոնալդ Թրամփի հայտարարություններին, որոնցում նա խոսել էր Գրենլանդիայի նկատմամբ ԱՄՆ հավակնությունների մասին։