Ռուսաստանի բյուջեին լուրջ դեֆիցիտ է սպառնում տարվա սկզբին

Ռուսաստանի ֆինանսների նախարարությունը կանխատեսում է դաշնային բյուջեի զգալի դեֆիցիտ 2026 թվականի սկզբին՝ նավթագազային եկամուտների թերակատարման պատճառով։ Այդ մասին «Ինտերֆաքս»-ին հայտնել է նախարարի տեղակալ Վլադիմիր Կոլիչևը՝ ընդգծելով, որ համաշխարհային շուկաներում նավթի ցածր գները շարունակում են ճնշում գործադրել բյուջեի եկամուտների վրա։

Կոլիչևի խոսքով՝ հատկապես խնդրահարույց է ռուսական Urals տեսակի նավթի գինը, որը կիրառվում է հարկման հաշվարկներում։ Նա նշել է, որ հենց նավթագազային հատվածում է ձևավորվելու հիմնական եկամտային բացը։ Միաժամանակ, տարվա առաջին ամիսներին՝ հունվար–փետրվարին, ավանդաբար իրականացվում են պետական գնումների նախավճարներ, ինչն էականորեն ավելացնում է դաշնային բյուջեի ծախսերը։

Ֆինանսների նախարարության գնահատմամբ՝ 2025 թվականի արդյունքներով դաշնային բյուջեի դեֆիցիտը կազմել է մոտ 5,6 տրիլիոն ռուբլի։ Տարվա ընթացքում եկամուտներն աճել են ընդամենը 1,6 տոկոսով, մինչդեռ ծախսերը՝ 6,8 տոկոսով։ Փորձագետները դեֆիցիտի խորացումը կապում են ռազմական ծախսերի աճի և նավթագազային եկամուտների կտրուկ նվազման հետ, իսկ դրա մի մասը կառավարությունը փորձել է փակել ավելացված արժեքի հարկի բարձրացման միջոցով։