Բարսելոնայի մերձակայքում մարդատար գնացք է դուրս եկել գծերից․ կա զոհ և ծանր վիրավորներ

Իսպանիայի Բարսելոնա քաղաքի մերձակայքում մարդատար գնացքը դուրս է եկել երկաթուղային գծերից այն բանից հետո, երբ ուժեղ տեղումների հետևանքով պաշտպանիչ պատը փլուզվել է և ընկել ռելսերի վրա։ Reuters-ի փոխանցմամբ՝ վթարի հետևանքով գնացքի վարորդը զոհվել է, իսկ առնվազն չորս ուղևոր ստացել են ծանր վնասվածքներ։

Կատալոնիայի հրշեջ ծառայության ներկայացուցիչ Կլաուդի Գալյարդոն հայտնել է, որ ընդհանուր առմամբ տուժել է 37 մարդ, որոնցից չորսի վիճակը ծանր է։ Նրա խոսքով՝ բոլոր ուղևորները արդեն դուրս են բերվել գնացքից։ Դեպքը տեղի է ունեցել Բարսելոնայի արվարձան Գելիդայի շրջանում, որտեղ դեպքի վայր են ուղարկվել 20 շտապօգնության մեքենա և 38 հրշեջ ջոկատ։

Այս վթարը տեղի է ունեցել ընդամենը երկու օր անց այն ողբերգական միջադեպից, երբ Իսպանիայի հարավում՝ Կորդոբա նահանգում, արագընթաց գնացքների բախման և դուրսգրման հետևանքով զոհվել էր 42 մարդ։ Reuters-ը նշում է, որ Բարսելոնայի մերձքաղաքային երկաթուղային ցանցը տարիներ շարունակ խնդիրներ ունի ֆինանսավորման պակասի և հաճախակի տեխնիկական միջադեպերի պատճառով։ Նույն օրը ևս մեկ միջադեպ է գրանցվել Ժիրոնայի հարավում, որտեղ երթևեկությունը դադարեցվել է գնացքի առանցքի ռելսերից դուրս գալու պատճառով։