Ֆարել Ուիլյամսը Փարիզում ներկայացրել է Louis Vuitton-ի տղամարդկանց նոր հավաքածուն՝ զուսպ շքեղության շեշտադրումով

Louis Vuitton-ի տղամարդկանց գծի կրեատիվ տնօրեն Ֆարել Ուիլյամսը Փարիզի նորաձևության շաբաթվա մեկնարկին ներկայացրել է աշուն–ձմեռ 2026–2027 հավաքածուն՝ կառուցված զուսպ էլեգանտության և մեղմ գունապնակի վրա։ Reuters-ի փոխանցմամբ՝ ցուցադրությունը տեղի է ունեցել LVMH խմբի Louis Vuitton հիմնադրամի հարևանությամբ տեղադրված հսկա խորանարդի ներսում՝ ժամանակակից մինիմալիստական միջավայրում։

Հավաքածուում գերակշռել են բեժ, մոխրագույն և շագանակագույն երանգները՝ համադրված դասական կոստյումների, երկար վերարկուների, երկշարք բաճկոնների և կաշվե գլխարկների հետ։ Գունային շեշտադրումները սահմանափակվել են խորը կարմիրի և բաց դեղինի նուրբ դետալներով։ Ցուցադրության բեմադրությունը հիշեցրել է գյուղական հանգիստ միջավայր՝ փայտի և ապակու մաքուր ձևերով, իսկ մոդելները քայլել են արհեստական խոտածածկի վրայով։

Շոուն ուղեկցվել է լարային նվագախմբի և գոսպելային պարողների կատարմամբ՝ հիփ-հոփի ռիթմերի ներքո։ Ցուցադրության ավարտին Ֆարել Ուիլյամսը անձամբ դուրս է եկել ողջունելու հանդիսատեսին, որի կազմում են եղել Ջոն Լեջենդը, ռեփերներ Future-ը և Skepta-ն, ինչպես նաև Ֆրանսիայի առաջին տիկին Բրիժիտ Մակրոնը։