Մի քանի ռոտվեյլերներ հարձակվել են երեխաների վրա՝ հարուցվել է քրեական գործ

Մոսկվայի մարզում մի քանի ռոտվեյլեր հարձակվել են երեխաների վրա, ինչի կապակցությամբ իրավապահները քրեական գործ են հարուցել։ «Մոսկվա» քաղաքային լրատվական գործակալության փոխանցմամբ՝ միջադեպը տեղի է ունեցել հունվարի 16-ին Ռամենսկոյի կոտեջային ավանում։

Քննության տվյալներով՝ շները փախել են մասնավոր տարածքից և հարձակվել անչափահասների վրա, որոնք սահնակով սահում էին բլրից։ Երեք երեխաներից երկուսին հաջողվել է փախչել, իսկ մեկ տղա վնասվածքներ է ստացել՝ շների կծածների հետևանքով։ Երեխային բժշկական օգնություն է ցուցաբերվել, նրան կարել են։

Վերջին ամիսներին Ռուսաստանում շների հարձակումների թեման կրկին լայն քննարկման առարկա է դարձել։ Ավելի վաղ հաղորդվել էր, որ Թաթարստանում բժիշկներին չի հաջողվել փրկել 9-ամյա աղջկան, որը 2025 թվականի նոյեմբերին ենթարկվել էր շների հարձակման, իսկ մինչ այդ Կրասնոյարսկի երկրամասում շների հարձակման զոհ դարձած երեխայի մայրը զոոպաշտպաններին հրավիրել էր իր որդու հուղարկավորությանը։