Հայտնի կենսաբանական հավելումը կարող է խանգարել քաղցկեղի բուժման արդյունավետությանը

Օհայո նահանգի համալսարանի բժշկական կենտրոնի ուռուցքաբանները զգուշացնում են, որ բիոտինը՝ լայնորեն կիրառվող սննդային հավելում, կարող է խեղաթյուրել լաբորատոր հետազոտությունների արդյունքները քաղցկեղով հիվանդների մոտ և ազդել բժշկական որոշումների վրա։ Ինչպես նշվում է JCO Oncology Practice հանդեսում հրապարակված ուսումնասիրությունում, առայժմ համոզիչ ապացույցներ չկան, որ բիոտինը իրականում օգնում է քիմիաթերապիայի հետևանքով առաջացած մազաթափության դեպքում։

Մասնագետների բացատրությամբ՝ բիոտինը (վիտամին B7) ուղղակիորեն չի փոխում հորմոնների կամ ուռուցքային մարկերների մակարդակը, սակայն խանգարում է այն լաբորատոր թեստերի աշխատանքին, որոնք հիմնված են բիոտինից կախված քիմիական ռեակցիաների վրա։ Արդյունքում ցուցանիշները կարող են լինել կեղծ նվազեցված կամ բարձրացված, ինչը հատկապես վտանգավոր է կրծքագեղձի, շագանակագեղձի, վահանաձև գեղձի և ձվարանների քաղցկեղի դեպքում, երբ արյան անալիզները կարևոր դեր ունեն բուժման արդյունավետության գնահատման և կրկնության վաղ հայտնաբերման համար։

Բժիշկները նշում են, որ շատ հիվանդներ բիոտինը սկսում են ընդունել ինքնուրույն՝ առանց բժշկի հետ խորհրդակցելու, ինչը կարող է հանգեցնել հակասական հետազոտությունների արդյունքների և բուժման ձգձգման։ Ուսումնասիրության հեղինակները շեշտում են, որ նույնիսկ «անվնաս» համարվող հավելումները կարող են ռիսկեր պարունակել ուռուցքաբանական հիվանդությունների դեպքում։ Որպես մազաթափության ավելի անվտանգ այլընտրանք առաջարկվում է մինօքսիդիլը, որի արդյունավետությունը ապացուցված է, իսկ բոլոր հավելումների և դեղամիջոցների ընդունումը պետք է պարտադիր համաձայնեցնել բժշկի հետ։