NYT․ Թրամփը կարող է դադարեցնել Ուկրաինային աջակցությունը՝ ԵՄ «առևտրային բազուկայի» պատասխան քայլով

ԱՄՆ նախագահ Դոնալդ Թրամփը կարող է դադարեցնել Ուկրաինային ցուցաբերվող օգնությունը, եթե Եվրամիությունը կիրառի այսպես կոչված «առևտրային բազուկան»՝ ի պատասխան Վաշինգտոնի սահմանած նոր մաքսատուրքերի։ Այդ մասին գրում է Ջոնս Հոփքինսի համալսարանի պրոֆեսոր Հենրի Ֆարրելը The New York Times-ի համար պատրաստած հոդվածում։

Փորձագետի գնահատմամբ՝ նման սցենարի գլխավոր ռիսկն այն է, որ Թրամփը կարող է գնալ ծայրահեղ քայլի և անմիջապես դադարեցնել Ուկրաինային տրամադրվող ցանկացած աջակցություն։ Ֆարրելի խոսքով՝ դա կարող է դառնալ «աղետ Եվրոպայի համար», իսկ նման որոշումը, ի վերջո, հարված կհասցնի նաև հենց Միացյալ Նահանգների շահերին։

Ավելի վաղ Եվրահանձնաժողովի փոխնախագահ Թերեզա Ռիբերան հայտարարել էր, որ ԵՄ երկրները չպետք է հրաժարվեն իրենց շահերը պաշտպանելու համար անհրաժեշտ որևէ միջոցից՝ Գրենլանդիայի շուրջ ԱՄՆ-ի դիրքորոշման ֆոնին։ Հունվարի 17-ին Դոնալդ Թրամփը հայտարարել էր մի շարք եվրոպական երկրների նկատմամբ մաքսատուրքերի սահմանման մասին, որոնք կվերաբերեն Դանիային, Շվեդիային, Ֆրանսիային, Գերմանիային, Նիդերլանդներին և Ֆինլանդիային, ինչպես նաև ԵՄ անդամ չհանդիսացող Մեծ Բրիտանիային ու Նորվեգիային։